Hong-Kong, Kina do të eliminojë opozitën

Propozime të reja nga Pekini për të ndryshuar mënyrën e zgjedhjes dhe numrin e ligjvënësve pritet të eliminojnë opozitën në rajonin e Hong-Kongut. Kina kërkon që organi legjislativ i rajonit të kontrollohet nga patriotë të vërtetë.

Kina do që të ndryshojë sistemin zgjedhor në rajonin e Hong-Kongut, në dëm të opozitës.

Asambleja Kombëtare Popullore hapi të premten sesionin e saj vjetor në Pekin, duke parashtruar objektivat politikë dhe ekonomikë për të ardhmen e afërt, por edhe sfidat rajonale që has vendi.

Rajoni kinez gjysmautonom i Hong-Kongut, ku opozita kërkon më shumë demokraci dhe autonomi, në qeverisje, shihet si vatër destabiliteti për Kinën.

Për këtë arsye, Uang Çen, nënkryetari i Komitetit të Përhershëm të Asamblesë Kombëtare Popullore, propozoi një metodë të re zgjedhjeje të ligjvënësve në Hong-Kong dhe reduktim të numrit të tyre.

“Kaosi në shoqërinë e Hong-Kongut tregon se sistemi aktual zgjedhor ka boshllëqe dhe defekte të dukshme, që u japin zë forcave antikineze. Prandaj duhen masa të nevojshme për të eliminuar rreziqet e fshehta dhe për të garantuar që patriotët janë trupa kryesore në administrim të Hong-Kongut.”

Në 2019-n protestat për më shumë demokraci në Hong-Kong tronditën rajonin gjysmautonom, duke detyruar Kinën të ndërhyjë me ligj të posaçëm që i shmang përpjekjet për revoltë ndaj autoriteteve.

47 aktivistë dhe politikanë të opozitës u arrestuan në fundjavë me akuzën se kishin tentuar të rrëzonin qeverinë duke improvizuar një proces zgjedhor para zgjedhjeve konkrete parlamentare.