Hong Kongu “zhytet” në recesion – Protestat janë shkaktari kryesor, ekspertët japin alarmin

Ekonomia e Hong Kongut është zhytur në recesion për të parën herë në një dekadë gjatë tremujorit të tretë,  tregojnë të dhënat e fundit që vijnë nga vendi. Protestat e fuqishme anti-qeveritare vlerësohen si shkaktari kryesor i kësaj situate. Kështu gjatë periudhës Korrik-Shtator të këtij viti, ekonomia vlerësohet të jetë tkurrur me një normë në 3.2% në krahasim me tremujorin paraardhës, tregojnë të dhënat më të fundit.

Veç protestave anti-qeveritare një nxitje e fortë në zhytjen  e vendit në recesion kanë dhënë edhe tensionet tregtare mes dy ekonomive më të mëdha të botës. Tremujori i tretë i vitit është i dyti me radhë me Prodhimin e Brendshëm Bruto në kontraktim.

Kjo do të thotë se janë përmbushur kriteret e nevojshme për të arritur atë që njihet si recesion teknik. Tashmë ekonomia e vendit hyn në një spirale të rrezikshme. Analistët dhe ekspertët e ekonomisë parashikojnë një recesion edhe më të thellë se ai i krizës financiare globale në vitet 2008/2009, apo ai i epidemisë së SARS-it në vitin 2003, pasi në horizont nuk duket asnjë sinjal se protestat do të ndalen.