Italia nuk ka probleme me emigrimin e shqiptarëve, thotë kreu i PE-së

Kryetari i Parlamentit Europian, Davide Sassoli, ndodhet në Itali ku është vlerësuar me çmimin “Celësi i Qytetit” në Firenze.

Gjatë një takimi me gazetarët e mediat italiane ai ka komentuar dhe vendimin e marrë nga Këshilli i Europës për mos hapjen e negociatave me Shqipërinë e Maqedonisë e Veriut me Bashkimin Europian.

“Ne jemi në favor të hapjes së negociatave me Shqipërinë e Maqedoninë e Veriut” ka deklaruar ai.

“Mendojmë se ishte një gabim pengimi i këtij procesi. E gjithashtu mendojmë se vënia në siguri e Ballkanit Perëndimor mund ta bëjë më të sigurt hapësirën europiane.”

Pyetjes së gazetarëve se në rast se kjo do ndodhte mjaft shqiptarë do të emigronin në Itali, kreu i Parlamentit Europian u përgjigj se “shqiptarët që ndodhen në Itali po kthehen në vendin e tyre e ky problem është kapërcyer me kohë.”

Ndërsa mbi problematikat me Turqinë, Davide Sassoli është shprehur se Parlamenti Europian ka kërkuar ndërprerjen e procesit të integrimit të Ankarasë në Bashkimin Europian.

Mbi rolin e Parlamentit Europian në Bashkimin Europian, ai deklaroi se “Parlamenti Europian ka një raport të drejtpërdrejtë me qytetarët, gjë që qeveritë nuk e kanë”.

PE, tha ai, duhet të përdorë të gjithë fuqinë që ka.

“Sot Parlamenti Europian është më koshient për rolin e tij se sa në legjislaturat e mëparshme.”

Ndërsa mbi problematikat e emigracionit, numri një i Parlamentit Europian shprehet se “emigrantët duhet të mbërrijnë në Europë dhe përmes kanaleve humanitare. Duhet të keni ndërshmërinë e kurajon të pranojmë se industria e bujqësia europiane ka nevojë për krah pune e kemi nevojë për një fluks të rregullt, të organizuar e të sigurt emigracioni e për një marrëveshje vullnetare mes vendeve përfshirë dhe Gjermaninë e Francën”, tha ai.