Kampi i emigrantëve në Shqipëri, Meloni: Do të funksionojë pa vonesa

Kryeministrja italiane, Giorgia Meloni, konfirmoi se kampet e emigrantëve në Shqipëri, të promovuara nga qeveria e saj e djathtë, do të funksionojnë sipas planit, pavarësisht pengesave ligjore dhe vonesave të shkaktuara nga vendimet gjyqësore.

“Po shkon pikërisht ashtu siç ju kam thënë gjithmonë: qendrat në Shqipëri do të funksionojnë”, deklaroi Meloni para mbështetësve të partisë së saj, “Vëllezërit e Italisë”, gjatë një ngjarjeje në Romë. Ajo iu referua gjithashtu marrëveshjes së fundit brenda Bashkimit Europian për një qëndrim më të ashpër ndaj migracionit.

Sipas marrëveshjes, shtetet e BE-së ranë dakord të rrisin presionin mbi kërkuesit e azilit të refuzuar dhe të sigurojnë deportimin e tyre në mënyrë më efikase. Planet për qendrat e kthimit jashtë BE-së, përfshirë Shqipërinë, janë pjesë e këtij qëndrimi, por ende duhet të miratohen përfundimisht.

Derisa plani italian për kthimin e kërkuesve të azilit të refuzuar nuk ka avancuar deri tani, Meloni u shpreh e pakënaqur për “gjykime të politizuara nga drejtësia”, duke shtuar se projekti do të realizohet me një vonesë prej rreth një viti e gjysmë.

Projekti parashikon hapjen e një qendre pritjeje në fund të vitit 2024 në qytetin port të Shëngjinit dhe një kamp për deportim në Gjadër. Aktualisht, objektet janë kryesisht bosh dhe kostot vlerësohen rreth 130 milionë euro në vit (152 milionë dollarë).

Kjo nismë ka shkaktuar debate brenda Italisë dhe BE-së, përsa i përket ligjshmërisë dhe ndikimit mbi të drejtat e emigrantëve, por qeveria italiane mbetet e vendosur për zbatimin e saj sipas planit të miratuar.