Karantina e udhëtarëve në Britaninë e Madhe një “marifet politik”, ata mund të luajnë golf

Rregullat e reja që kërkojnë që të gjithë njerëzit që futen në Britani të Madhe të izolohen për 14 ditë, kanë hyrë në fuqi.

Të gjithë udhëtarët që mbërrijnë me avion, traget ose tren – përfshirë shtetasit e Mbretërisë së Bashkuar – duhet të japin një adresë ku ata do të izolohen. Shkelësit e rregullave do të gjobiten.

Sekretarja britanike e Punëve të Brendshme, Priti Patel, ka thënë se ligjet janë hartuar “për të parandaluar një valë të dytë” të koronavirusit.

Por shefi i Ryanair ka thënë se rregullat janë një “marifet politik” dhe nuk janë një karantinë e mirëfilltë.

Michael O’Leary i tha BBC: “Mund të jesh në Sainsbury, mund të jesh në plazh, mund të jesh në kursin e golfit në një rast ku Zyra e Brendshme të thërret – gjithçka që ata do të kenë është një numër i lëvizshëm”.

Ai pretendoi se edhe Zyra e Brendshme pranoi se rregullat ishin të pazbatueshme.

Disa industri kanë paralajmëruar se do të ndikohen shumë nga rregullat, dhe Z. O’Leary paralajmëroi shkatërrim.

Megjithë kritikat nga bizneset, zonja Patel ka thënë se masat janë “proporcionale” dhe po zbatohen “në kohën e duhur”.