Krah fotos së bombardimeve, Izraeli citon një varg nga Kurani
Profili zyrtar në Twitter i Izraelit në gjuhën arabe, citoi një varg nga Kurani teksa tregonte njëkohësisht pasojat e bombardimeve në Gaza. Mesazhi përmbante një ajet nga Surja Al-Fil e Kur’anit, e cila i referohet ndëshkimit të Zotit ndaj Popullit të Elefantit, i cili u përpoq të shkatërronte Qaben e Shenjtë shekuj më parë. “A nuk e keni menduar, sesi i trajtoi Zoti juaj aleatët e Elefantit?”, thuhej në mesazh.
Nga bombardimet kanë humbur jetën 212 palestinezë, përfshirë 61 fëmijë dhe 35 gra e janë plagosur 1,400 të tjerë, sipas Ministrisë së Shëndetësisë Palestineze.
Sulmet ajrore në Gaza u paraprinë nga disa ditë tensionesh dhe incidenti në Jeruzalemin Lindor të pushtuar, ku qindra palestinezë u sulmuan nga forcat izraelite në Xhaminë Al-Aqsa dhe në lagjen Sheikh Jarrah të qytetit.
Izraeli e pushtoi Jeruzalemin Lindor gjatë luftës arabo-izraelite 1967 dhe e aneksoi të gjithë qytetin në 1980, një lëvizje që nuk është njohur kurrë nga komuniteti ndërkombëtar.
