Kriza në kufi nga dhuna e Erdoganit

Pasi Turqia vendosi të hapë kufirin me Greqinë, me mijëra refugjatë jo vetëm nga Siria u nisën drejt BE-së. Greqia u përgjigj menjëherë, e me forcë. Kryetari i Partive Popullore Europiane në Parlamentin Europian, Manfred Ueber, i cili vjen nga e njëjta familje politike si kryeministri grek, fajëson udhëheqësin turk për situatën e krijuar.

”Duhet ta themi hapur se dhuna që po krijohet në kufijtë tanë është dhuna e Erdoganit. Ai është përgjegjësi. Kryeministri grek ka thënë publikisht në ditët e fundit se kufiri është mbyllur. Pikë. Qeveria turke u ka dhënë njerëzve shpresa që nuk janë realiste. Shpresojmë që Erdogani të heqë dorë nga ky përshkallëzim”.

Qeveria greke tha se do t’i pezullonte kërkesat për azil për një muaj. Drejtuesit e BE-së vizituan vendin duke shprehur mbështetjen e tyre. OKB thotë se Athina nuk ka të drejtë t’i ndërpresë kërkesat për azil. ”Azilkërkuesit dhe emigrantët janë përdorur si gurë shahu nga qeveria turke, për t’i bërë presion BE-së dhe për t’i vënë në një situatë më të vështirë se kur nisi kriza”, tha Filip Dam, Human Rights Watch.