Lufta në Ukrainë, Papa Françesku: Asnjë fitore nuk mund të ndërtohet mbi rrënoja

Papa Françesku bën thirrje për një armëpushim dhe negociata paqeje, pak ditë para 1 vjetorit të luftës ruse në Ukrainë. Për të asnjë fitore nuk mund të ndërtohet mbi rrënoja.

Papa i cili ka bërë thirrje për t’i dhënë fund dhunës në Ukrainë pothuajse në çdo paraqitje publike që nga pushtimi i vendit nga Rusia më 24 shkurt 2022, foli në audiencën e tij të përgjithshme javore në Vatikan.

“Ka kaluar një vit që nga fillimi i kësaj lufte absurde dhe mizore, një përvjetor i trishtuar. Numri i të vdekurve, të plagosurve, refugjatëve dhe njerëzve të zhvendosur, shkatërrimi dhe dëmet ekonomike dhe sociale flasin vetë”, tha Papa. Ambasadori i Ukrainës në Vatikan, Andrii Yurash mori pjesë në audiencë së bashku me një delegacion zyrtarësh ukrainas.