Macron konfirmon ndërtimin e aeroplanmbajtëses së re bërthamore, gati në 2038

Presidenti francez Emmanuel Macron ka konfirmuar zyrtarisht planet për ndërtimin e një aeroplanmbajtëseje të re, e cila do të jetë më e madhe dhe më moderne se ajo aktuale, “Charles de Gaulle”. Ky anije luftarake e re pritet të hyjë në shërbim në vitin 2038. Njoftimi u bë nga kreu i shtetit francez gjatë qëndrimit të tij në Abu Dhabi, ku ndodhej me trupat franceze për Krishtlindje.

Macron theksoi se vendimi për të nisur këtë program madhor u mor pas një shqyrtimi të plotë dhe të kujdesshëm, në përputhje me ligjet e fundit të planifikimit ushtarak. Ai e përshkroi aeroplanmbajtësen e ardhshme si një dëshmi të fuqisë së Francës, duke përfshirë industrinë dhe teknologjinë e saj, si dhe një mjet në shërbim të lirisë në det, veçanërisht në kohëra të trazuara.

Aeroplanmbajtësja e re, ashtu si paraardhësja e saj, do të funksionojë me energji bërthamore, por do të ketë përmasa dukshëm më të mëdha. Ajo do të peshojë 80,000 tonë dhe do të jetë rreth 310 metra e gjatë, krahasuar me “Charles de Gaulle” që ka një zhvendosje prej 42,000 tonësh dhe një gjatësi prej 261 metrash. Me një ekuipazh prej 2,000 marinarësh, anija do të jetë në gjendje të mbajë 30 avionë luftarakë.

Lajmi për fillimin e këtij projekti ambicioz u prit me interes të madh, pavarësisht sfidave fiskale me të cilat përballet qeveria franceze. Kostoja e lartë e investimeve të nevojshme dhe kërcënimet gjeopolitike në zhvillim e vendosin projektin nën një presion të caktuar. Gjatë vizitës në Emiratet e Bashkuara Arabe, Macron shfrytëzoi rastin për të forcuar marrëdhëniet strategjike ushtarake me këtë aleat dhe për të kërkuar bashkëpunim më të madh në luftën kundër trafikut të drogës.