Mbyllen për një muaj lokalet, pas shtimit të rasteve me Covid-19

Europa vijon të jetë në luftë të egër me Covid-19. Baret dhe kafet në Bruksel do të mbyllen për një periudhë një mujore për shkak të një rritje të madhe të rasteve të reja me Covid-19. Në zonën e Brukselit janë regjistruar 502.4 raste për 100 mijë banorë, më shumë se dyfishi në shkallë kombëtare (232.8 për 100 mijë banorë).

Autoritetet kanë raportuar se 15 për qind e shtretërve në pavijonin e terapisë intensive janë zënë. “Kjo vendos një barrë të madhe tek punonjësit e shëndetësisë dhe rrezikon përkujdesjen e tyre ndaj pacientëve të tjerë”, thuhej në deklaratë.

Kufizimet e reja në Bruksel vijnë një ditë pasi qeveria federale vendosi masa shtrënguese në mbarë vendin, duke urdhëruar mbylljen e bareve dhe kafeve jo më vonë se 11 në mbrëmje dhe duke ndaluar grumbullimet e më shumë se 4 qytetarëve qoftë në shtëpi apo edhe ambiente të jashtme.