Mbyllet aeroporti i Gjenevës

Aeroporti i Gjenevës është mbyllur “deri në një njoftim tjetër” pasi qyteti zviceran u mbulua nga dëbora.

Faqja e internetit e aeroportit thotë se udhëtarët duhet të qëndrojnë larg për momentin dhe rekomandon që ata të kontrollojnë linjat ajrore të tyre për të parë oraret e fluturimit.

Zëdhënësi i aeroportit Sebastien Leprat tha se ishte planifikuar që ai të rihapej në orën 9 të mëngjesit, por kjo u shty dhe më pas nuk është dhënë asnjë vendim për rihapjen.

Ai tha se kushtet e vështira të motit në të gjithë Evropën mund të shkaktojnë vonesa të zgjatura.

Aeroporti tjetër i madh zviceran, ai i Zyrihut dukej më pak i prekur vetëm me disa vonesa të regjistruara në disa fluturime.“Trafiku rrugor dhe trafiku hekurudhor janë bllokuar”, sipas Radio Televizionit Zviceran.

Zvicra ka regjistruar këto ditët e fundit ulje temperaturash rekord me rreth minus 40 gradë Celsius në zonat malore.