Merkel – Putin bisedë telefonike për konfliktin në Ukrainën Lindore

Kancelarja gjermane Angela Merkel dhe presidenti rus Vladimir Putin kanë zhvilluar një bisedë telefonike gjatë të enjtes. Tema kryesore e diskutuar mes liderëve ka qenë konflikti në Ukrainën Lindore, teksa Berlini dhe Moska konfirmuan se palët kanë rënë dakord për një plan për rikthimin e vëzhguesve rusë të armëpushimit në zonën e konfliktuar.

Kryengritja në Ukrainë është pasuar nga 10 marrëveshje armëpushimi që prej prillit 2014, por Kievi edhe Moska kanë akuzuar njëri-tjetrin për prishje të akordeve. Armëpushimi i fundit hyri në fuqi në gusht dhe zyrtarët rusë nga Qendra e Përbashkët për Kontroll dhe Koordinim në Ukrainë kanë qenë pjesë e skuadrës për ruajtjen e paqes. Sidoqoftë, Moska tërhoqi stafin duke deklaruar se homologët ukrainas po pengonin punën e tyre.

Ka qenë pikërisht kjo arsyeja përse Merkel ka kërkuar këtë telefonatë me Putin, me qëllim zgjidhjen e situatës. Në një deklaratë të qeverisë gjermane lidhur me këtë shkëmbim mes palëve, kancelarja Merkel theksoi se funksionimi i Qendrës së Përbashkët të Kontrollit dhe Koordinimit duhet mbrojtur.