Ministri i jashtëm britanik: Rusia të mos ndërhyjë më në Europë

Ministri i jashtëm britanik, Boris Johnson i ka kërkuar Moskës zyrtare të mos ndërhyjë më në politikat e vendeve të Europës. Në një takim me homologun e tij rus Sergei Lavrov në Moskë, Johnson është ndalur në tema delikate si aneksimi i Krimesë nga Rusia dhe ndikimi destabilizues i Moskës në Ballkanin Perëndimor. “Gjërat mes nesh nuk janë të lehta për momentin, por ne nuk duhet të përcakohemi nga problemet që kemi,” u shpreh Johnson duke iu referuar edhe të tjera çështjeve të diskutuara mes palëve, si lufta në Siri, kriza koreano-veriore apo mbështetja e Rusisë për sulmet kibernetike dhe fushatat keqinformuese.

Por që në fillim të bisedimeve mes palëve, kreu i diplomacisë ruse Sergei Lavrov komentoi se marrëdhënia e tensionuar mes Moskës dhe Londrës nuk jane si pasojë e veprimeve të Rusisë. “Ju dhe kolegë të tjerë perëndimorë keni qasjen tuaj për ekzistencën e kësaj situate dhe preferoni t’i parashtroni publikisht këto arsye. Ne duam diskutim të drejtpërdrejtë lidhur me shqetësimet tona të përbashkëta,” u shpreh Lavrov.

Por pavarësisht shkëmbimeve të tensionuara, ministri britanik Johnson theksoi dëshirën e tij që Londra dhe Moska të bashkëpunojnë në pika ku kanë interesa të përbashkëta, duke e konsideruar si të rëndësishëm për sigurinë ndërkombëtare bashkëpunimin mes palëve njofton ora news.