Moderna: Vaksina jonë ruan 93% të efikasitetit edhe 6 muaj pas dozës së dytë

Vaksina anti-covid Moderna po përdoret në më shumë se 50 shtete. Prodhuesi amerikan i ilaçeve thotë se vaksina e saj kundër koronavirusit ruan funksionin mbrojtës me 93 për qind gjashtë muaj pas administrimit të të dyja dozave.

“Ne jemi të kënaqur që vaksina jonë kundër Covid-19 ka treguar efikasitet të qëndrueshëm. Jemi të vetëdijshëm se varianti Delta është një kërcënim domethënës. Pra, ne duhet të jemi vigjilentë”, tha në një deklaratë shefi ekzekutiv i kompanisë, Stephane Bancel.

Bancel deklaroi se vaksina e tyre ende siguron 93 për qind mbrojtje edhe gjashtë muaj pas vaksinimit të plotë. Prodhuesi tjetër i vaksinave, Pfizer-BioNTech, bëri një njoftim të ngjashëm javën e kaluar, duke thënë se vaksina e saj vazhdon të jetë 91 për qind mbrojtëse gjashtë muaj pas dozës së dytë.