Në Afrikë mund të vdesin 190,000 njerëz nga virusi, Kombet e Bashkuara paralajmërojnë një ‘tsunami’ urrejtjeje

Deri në 190,000 njerëz mund të vdisnin nga Covid-19 në Afrikë gjatë vitit të parë të pandemisë nëse masat e kontrollit dështojnë, sipas një studimi të Organizatës Botërore të Shëndetësisë (OBSH) bazuar në modelimin e parashikimit dhe analizimin e 47 vendeve të rajonit.

Organizata paralajmëroi gjithashtu se virusi mund të shtrihet në kontinent me vite.

Ndërkohë shefi i Kombeve të Bashkuara António Guterres deklaroi dje se pandemia e koronavirusit ka lëshuar një “tsunami urrejtje, ksenofobie,dhe frikësimi”, dhe bëri thirrje për një përpjekje të gjithanshme “për t’i dhënë fund gjuhës së urrejtjes në nivel global”.

Sekretari i Përgjithshëm i Kombeve të Bashkuara tha se ndjenja kundër të huajve është rritur në internet dhe në rrugë, dhe theksoi përhapjen e teorive të komplotit antisemitik dhe sulme anti-myslimane të lidhura me Covid-19.

Komentet e tij erdhën ndërsa Kina tha se ishte “gjithmonë e hapur për të bashkëpunuar” me hetimet e Organizatës Botërore të Shëndetësisë për origjinën e koronavirusit, pasi Donald Trump përsëriti pretendimet se shpërthimi e kishte origjinën në një laborator të Ëuhan.

Ndërsa spekulimet përhapen rreth origjinës së virusit, Guterres tha se migrantët dhe refugjatët janë fajësuar si burim i virusit dhe u është mohuar mundësia e trajtimit mjekësor.

Guterres u bëri thirrje udhëheqësve politikë të tregojnë solidaritet me të gjithë njerëzit dhe institucioneve arsimore të përqëndrohen në shkrim-leximin dixhital në një kohë kur ekstremistët po kërkojnë “prenë” e tyre në audiencën e izoluar dhe potencialisht dëshpëruese.

Ai u bëri thirrje mediave, posaçërisht mediave sociale, të heqin përmbajtjet raciste, misogyniste dhe përmbajtje të tjera të dëmshme, ndaj shoqërisë civile për të forcuar qasjen e tyre ndaj njerëzve të cenueshëm, dhe figurave fetare të shërbejnë si modele të respektit të ndërsjellë.

Sekretari i Përgjithshëm theksoi se Covid-19 “nuk i intereson se kush jemi, ku jetojmë, çfarë besojmë apo për ndonjë dallim tjetër”.

Numri global i vdekjeve nga koronavirusi i kaloi 269.500 të premten.