”Non papers” për kufijtë, Maas: Janë vetëm fjalë boshe

””Non papers”, pra dokument jo zyrtar. Nuk kanë gjë tjetër veçse fjalë bosh dhe askush nuk duhet të merret seriozisht me to”. Ministri i Jashtëm gjerman, Heiko Mass, mban këtë qëndrim lidhur me dokumentin jo zyrtar diplomatik që qarkulloi në Bruksel, për ndryshim të kufijve në Ballkanin Perëndimor sipas linjave etnike. Mass përgënjeshtroi përfshirjen e Gjermanisë tek të ashtuquajturit “non-papers”.

Dokumenti u publikua fillimisht nga media sllovene, nën autorësinë e pretenduar të kryeministrit slloven Janez Jansa e në adresë të presidentit të Këshillit Europian Charles Michell, si një propozim mbi trajtimin e problematikave në rajon pasi Sllovenia të marrë Presidencën e BE-së në korrik.

Edhe kryeministri Rama është përfshirë në debatin lidhur me çështjen e “non papers”, pasi gazeta austriake “Der Standard”, shkroi se ai u kishte thënë mediave shqiptare se e kishte parë “non papers” dhe hartën dhe se bashkë me Vuçiçin kishin qenë mbështetës të ripërcaktimit të kufijve sipas linjave etnike mes Kosovës dhe Serbisë.