OBSH e shqetësuar: Shtetet e pasura po minojnë iniciativën Covax

Të sigurosh vaksinat anti-covid nuk është aq e lehtë. Marrëveshjet e vendeve të pasura me prodhuesit e vaksinave anti-covid po minojnë iniciativën Covax, duke ulur numrin e dozave që mund të blihen. Kreu i Organizatës Botërore të Shëndetësisë, Tedros Adhanom Ghebreyesus thotë se ka një boshllëk prej 22.9 miliardë dollarësh për të financuar plotësisht qasjen në mjetet e nevojshme për të luftuar pandeminë. Për të paratë nuk janë e vetmja sfidë për OBSH-në, pasi nëse nuk ka vaksina në dispozicion për të blerë, atëherë fondet janë të parëndësishme.

”Disa vende të pasura po bëjnë kontrata me prodhuesit e vaksinave që minojnë marrëveshjet që Covax ka arritur dhe reduktojnë numrin e dozave që ky organizëm mund të blejë. Edhe nëse kemi fonde, mund të shpërndajmë vaksina për shtetet e varfra vetëm nëse vendet e pasura bashkëpunojnë duke respektuar ujditë që Covax ka bërë. Kjo nuk është një çështje bamirësie, por epidemiologjike”.

Shefi i Organizatës Botërore të Shëndetësisë theksoi se sa më shumë që të përhapet virusi, aq më të mëdha janë shanset që ai të ndryshojë duke i bërë vaksinat më pak efektive. Ghebreyesus u bëri thirrje të gjitha shteteve, përfshirë atyre të pasura, që të ndajnë menjëherë dozat në dispozicion dhe prodhuesve që t’u japin prioritet kontratave me Covax si dhe për të rritur pordhimin e vaksinave anticovid.