PE kërkon penalizimin e Serbisë: Integrim në BE nëse vendosin sanksione kundër Moskës

Këtë të enjte, Komisioni i Politikës së Jashtme të Parlamentit Evropian, miratoi raportin për strategjinë e re të zgjerimit. Procesi i negociatave të anëtarësimit të Serbisë, të kushtëzohet me mbështetjen e Beogradit për sanksionet ndaj Moskës.

“Duhet të bëhet prioritet përshtatja e vendeve nga procesi i zgjerimit me politikën e përbashkët të jashtme dhe të sigurisë së BE-së. Negociatat e anëtarësimit me Serbinë duhet të avancojnë vetëm nëse ky vend i bashkohet sanksioneve të BE-së ndaj Rusisë dhe bën përparim domethënës në reformat e nevojshme për integrim”, thuhet në raportin e PE-së.

Raporti për strategjinë e re të zgjerimit kërkon që ky proces të reformohet, në mënyrë që të shpërblehen ato vende që avancojnë në përmbushjen e kritereve, por edhe të sanksionohen ato shtete që shënojnë kthim prapa. Raporti u përgatit nga eurodeputeti kroat, Tonino Picula, dhe u miratua me 49 vota pro, pesë kundër dhe tetë abstenime.