Plagoset me thikë një police në Francë, në kërkim autori

Një ngjarje e rëndë ka ndodhur në Nantes të Francës, ku një police u plagos rëndë me një thikë në këmbë nga një burrë, i cili aktualisht është në arrati. Lajmi mësohet nga burime të policisë lokale, raportojnë mediat franceze.

Sulmi ndaj polices ndodhi në orën 10:00 të mëngjesit në ambientet e policisë bashkiake në La Chapelle-sur-Erdre, disa kilometra nga Nantes, në Francën perëndimore. Një individ hyri në stacionin policor të komunës dhe sulmoi policen, duke e goditur disa herë me thikë.

Makina e të dyshuarit u gjet në një aksident në qytet, dhe i dyshuari është në arrati, në këmbë dhe i armatosur. Ai po kërkohet në mënyrë aktive, ndërsa motivet e këtij krimi nuk dihen ende.

Në kërkim të tij janë angazhuar 240 xhandarë, duke përfshirë GIGN (Grupi i Ndërhyrjes së Xhandarmërisë Kombëtare) të Nantes, tre ekipe qensh dhe dy helikopterë.