Po konvertohen nga myslimanë në të krishterë

Që prej “zbarkimit” të tyre në Europë, kontineti ka ndryshuar. Fjala është për krizën që është në zemër të Europës, ardhur nga fluksi i refugjatëve dhe emigrantëve. Të parët edhe më në shumë në numër, kërkojnë një vendqëndrim të sigurt, të dytët kërkojnë punë të sigurt.

Mijëra refugjatë në Gjermani janë konvertuar nga feja Islame në atë të krishterë, pavarësisht rrezikut që bart për ta një veprim i tillë. “Deutsche Welle” citon rastin e Gottfried Martens, pastor i Kishës së Shën Triadhës, një kishë e pavarur evangjeliste-luterane në Berlin, i cili rrëfen sesi fillimisht në vitin 2008 ia kanë kërkuar një gjë të tillë dy refugjatë nga Irani.

Numri i atyre që afroheshin me dëshirë për të ndryshuar fe erdhi në rritje, e sot, kisha e tij ka qindra besimtarë që ndjekin meshën në gjermanisht e persisht.

Të konvertuarit aty janë gjermanë dhe iranianë. Disa prej tyre janë refugjatë që sapo kanë ardhur, e që janë ftuar nga të krishterë të tjerë në Gjermani, por ka “edhe mjaft të tjerë, të cilët kanë pasur kontakte më parë me fenë e krishterë në vendet ku jetonin”.

Dyndja më e madhe e konvertimeve, sidoqoftë shënohet pas mbylljes së itinerarit ballkanik, gjatë krizës së refugjatëve në vitin 2015 e 2016. “Asokohe kemi pasur deri në 250 vetë në kurset përgatitore të Kishës së Trinitetit”, thotë pastori.

Në vendet e origjinës, si Irani apo Afganistani, ata i pret përndjekja, e mbase edhe vdekja, ndërsa në Gjermani ka rregullisht raportime për sulme ndaj të konvertuarve.