Protesta për vdekjen e qytetarit, 47-vjeçari viktimë e dhunës brutale policore
Ndërhyrja brutale e policisë për të arrestuar një të dyshuar ka lënë të vdekur një qytetar afroamerikan dhe ka nxitur protestat kundër diskriminimit dhe racizmit në vend.
Dhuna e tepruar policore që i mori jetën një afroamerikani dy ditë më parë ka ndezur edhe njëherë tensionet me baza racore në Amerikë.
Mijëra banorë të qytetit verior të Mineapolisit u ngritën të martën në protesta kundër policisë.
Pasi nisi paqësisht, demonstrata precipitoi me kalimin e orëve në përplasje me forcat e rendit.
Turma lëshoi shishe me ujë dhe objekte të tjera të forta ndaj oficerëve, ndërsa këta të fundit kundërreaguan me gaz lotsjellës dhe plumba gome.
Shkak për përplasjet u bë vdekja e 47-vjeçarit George Floyd.
Ditën e hënë, policia kishte marrë informacione se i ndjeri ishte në tentativën për të kryer një mashtrim dhe në momentin e ndalimit pretendohet se u gjet nën efektin e alkoolit apo narkotikëve.
Sipas forcave të rendit, 47-vjeçari nuk iu bind urdhrit për t’u dorëzuar.
Por momenti fatal erdhi kur i dyshuari u detyrua të mbahej pesë minuta shtrirë në tokë, me njërin prej oficerëve që i bllokonte qafën me gjurin e tij.
I ndjeri dhe qytetarët përreth ankoheshin se personi nuk po merrte dot frymë dhe po humbte ndjenjat, por thirrjet e tyre nuk u morën parasysh.
Me mbërritjen e ambulancës, autoritetet njoftuan se qytetari ndërroi jetë gjatë transportit për në spital.
Policia kërkoi ndjesë dhe shkarkoi nga detyra katër oficerët e pranishëm në ngjarje.
“Jam para jush dhe qytetit të Mineapolisit për t’ju shprehur ngushëllimet më të thella. Shumica e burrave dhe grave që veshin këtë uniformë çdo ditë e kuptojnë rolin dhe marrëdhëniet që duhet të ruajmë me gjithë anëtarët e komunitetit tonë.”
Qytetarë dhe aktivistë kanë kërkuar që policët që shkaktuan vdekjen e 47-vjeçarit të ndiqen penalisht.
Incidenti i së hënës risolli në vëmendjen e publikut rastin e një tjetër afroamerikani që sërish do mbetej viktimë e dhunës brutale policore katër vite më parë pse po tregonte cigare në mënyrë ilegale.
Vdekja e tij sërish nxiti protesta dhe rebelime kombëtare, duke i dhënë hov lëvizjes për mbrojtjen e njerëzve me ngjyrë nga diskriminimi dhe racizmi.
