Protesta të dhunshme në Bjellorusi, ndalohen dhjetëra demonstrues, gaz lotsjellës dhe plumba gome

Policia në Bjellorusi vijoi edhe të dielën aksionin kundër protestave antiqeveritare, duke arrestuar dhjetëra pjesëmarrës që kërkonin largimin e presidentit Aleksandër Lukashenko.

Turmat e mbledhura në kryeqytet u shpërndanë me gaz lotsjellës dhe granata çorientuese, e në disa raste ndaj tyre raportohet se u qëllua edhe me plumba gome.

Qytetarët ishin mbledhur si çdo ditë që pas zgjedhjeve presidenciale që i siguruan 66-vjeçarit Lukashenko pushtetin edhe pas 26 vitesh.

Demonstruesit denoncuan edhe dhunën e policisë që përveçse ka keqtrajtuar e burgosur mijëra veta nga muaji gusht, sipas tyre shkaktoi ditën e enjte edhe vdekjen e një opozitari 31-vjeçar.

Policia mohoi akuzat ndërsa shtoi se viktima ishte goditur fizikisht më parë nga persona civilë.

Lukashenko ka urdhëruar mbylljen e kufirit me shtetet fqinje, Letoninë, Lituaninë, Poloninë dhe Ukrainën për të ndalur përhapjen e koronavirusit por edhe destabilizimin e vendit nga jashtë.

Mësohet se masat janë marrë edhe për studentët që i bashkohen protestave.

Rreth 300 prej tyre mësohet se janë përjashtuar nga universitetet por të dielën kreu i shtetit tha se kushdo që shkel ligjet nuk i duhet vendit dhe mund t’i drejtohet lirisht Polonisë fqinje.

Bashkimi Europian ka vendosur sanksione politike dhe ekonomike ndaj 55 zyrtarëve bjellorusë, mes tyre edhe presidentit Lukashenko, duke apeluar për ndaljen e dhunës dhe hetim të krimeve kundër qytetarëve, në të kundërt në listën e zezë europiane do të shtohen funksionarë të tjerë.

Kreu i shtetit deri tani i ka shpërfillur thirrjet për dialog me opozitën politike.