Publikohen pamjet, si e dogjën 6 afganët kampin e emigrantëve në Greqi

Ky është momenti kur një nga dy 17-vjeçarët afganë të arrestuar, i vë zjarrin kampit të emigrantëve në Moria duke përdorur një karton të ndezur.

Video u ngarkua sotnë rrjetet sociale, gjashtë ditë pas zjarrit që shkatërroi strukturën e Morisë.

Po sot policia njoftoi arrestimin e gjashtë personave, mes tyre edhe dy 17 vjeçarët.

Kundër tyre është ngritur një çështje për formimin e një organizate kriminale, zjarrvënie, dëmtim të pronës së huaj, qëndrim si dhe armëmbajtje pa leje. Urdhër arrestet u lëshuan dje dhe u ekzekutuan sot.

Të gjithë të akuzuarit janë shtetas afganë.

Sipas informacionit, njëri nga 17-vjeçarët ishte vendosur në një strukturë mikpritjeje në Pieria dhe i dyti në një zonë të ngjashme në Selanik. Pjesa tjetër u arrestua në Lesvos.

Zyrtarët qeveritarë zbuluan se persona të tjerë ishin të përfshirë në ngjarjen e martës së kaluar dhe po punohet për identifikimin e tyre.

Por theksuan se gjashtë të arrestuarit janë personat që luajtën rol kryesor në shkatërrimin e strukturës.

Hetimi paraprak konfirmoi se djegia e strukturës së kampit erdhi pas një revolte që shpërtheu kundër karantinimit të 35 afganëve që dolën pozitiv për koronavirusin.