Putin thotë se mbështet Kamala Harris në zgjedhjet presidenciale, Shtëpia e Bardhë: I bëjmë thirrje mos të ndërhyjë

Shtëpia e Bardhë i bën thirrje presidentit të Rusisë, Vladimir Putin, që të mos ndërhyjë më në zgjedhjet presidenciale në SHBA, pasi ai shprehu mbështetjen e tij për nënpresidenten amerikane, Kamala Harris.

“Të vetmit njerëz që pritet të përcaktojnë se kush do të jetë presidenti i ardhshëm i Shteteve të Bashkuara janë populli amerikan dhe ne do ta vlerësonim shumë nëse zoti Putin do të ndalonte së foluri për zgjedhjet tona dhe do të ndalonte ndërhyrjen”,-tha zëdhënësi i Këshillit të Sigurisë Kombëtare të Shtëpisë së Bardhë, John Kirby.

Duke folur në Forumin e Euroazisë Lindore në qytetin rus Vlladivostok të enjten, Putini tha se Moska parapëlqen që Harris t’i fitojë zgjedhjet e nëntorit në SHBA. “I parapëlqyeri ynë ishte [Joe] Bideni. Ai është tërhequr nga gara, por ai rekomandoi të mbështetet Harrisi. Ne do ta bëjmë këtë. Ne do ta mbështesim atë”, tha Putini.