Refugjatët po futen shpejt në tregun e punës

Integrimi në tregun e punës i refugjatëve të ardhur në Gjermani në vitet e fundit po arrihet më shpejt se sa ishte menduar, sipas ekspertëve, paçka se pagat e tyre janë relativisht të ulta. Referuar vlerësimeve të Institutit për Tregun e Punës dhe Studimin e Profesioneve (IAB), refugjatët po integrohen më shpejt në tregun e punës, se sa mendohej më parë.

”Unë mendoj, se në vjeshtë afër 40% e refugjatëve në moshën e punës do të arrijnë të futen në tregun e punës”, ka thënë së fundmi drejtuesi i sektorit të migrimit, integrimit dhe studimit të tregut të punës në IAB, Herbert Brücker për rrjetin redaksional, ”Netzwerk Deutschland”. Me këto ritme mund të jemi ”të kënaqur”, tha ai.

Brücker tha më tej, se afërsisht 36% e refugjatëve në moshën 15 deri në 64-vjeç janë të punësuar. ”Këta janë rreth 380.000-400.000 vetë. ”Shumë prej tyre janë të punësuar si punëtorë për një kohë të kufizuar, edhe pse me rroga relativisht të ulta”. Por përveç kësaj, thotë eksperti Herbert Brücker, ka një numër të madh refugjatësh që punojnë në gastronomi, në fushën e ”Security”, të pastrimit, në ndërtim dhe në kujdesin shëndetësor ndaj të moshuarve”. Afër 50% e refugjatëve në Gjermani kanë një punë të kualifikuar.