Shkencëtarët: Virusi nuk zhduket me rritjen e temperaturave por…

Kur shpresa ishte e madhe se me rritjen e temperaturave, Covid-19 do të zhdukej, një panel prestigjioz tha për Shtëpinë e Bardhë se nuk duket sikur virusi do të largohet. Sipas tyre, ajo që do të ndikojë në uljen e rasteve të infektimit është imuniteti i popullatës. Anëtarët e Akademisë Kombëtare të Shkencave, thanë se të dhënat për koronavirusin janë të përziera dhe vihet re se virusi përhapet aq lehtë në mot të ngrohtë sa edhe në mot të ftohtë.

“Ekzistojnë disa prova që sugjerojnë se koronavirusi mund të transmetohet me efikasitet në mjedise me temperaturë të lartë, në ambiente të lagështa; megjithatë, duhet patur parasysh mungesa e imunitetit”. Letra drejtuar Presidentit Trump vuri në dukje se një studim i bërë në Kinë tregoi se edhe në kushte maksimale të temperaturës dhe lagështirës, virusi u përhap mesatarisht te dy persona të tjerë për çdo person të infektuar.

Në letër përmendet edhe rasti i Iranit dhe Australisë, dy vende me klimë të ngrohtë, ku përhapja e koronavirusit po bëhet në ritme të shpejta. Shkencëtarët thonë se fakti që gripi dhe sëmundje të tjera janë sezonale lidhet edhe me imunitetin e individëve. Lloje të gripit kanë shpërthyer në mot të ngrohtë dhe më pas kanë pasur një valë të dytë gjashtë muaj më vonë.