Shkon në 35 numri i viktimave nga sulmi në Universitetin e Kabulit, shtohet zemërimi mes njerëzve

Numri i viktimave nga sulmi në Universitetin e Kabulit është rritur në të paktën 35. Lajmin e bënë të ditur dy burime qeveritare të martën, ndërsa studentët protestuan mbi sulmin dhe vendi shënoi një ditë zie.

Persona të armatosur hynë në universitet të hënën, në sulmin e dytë ndaj një institucioni arsimor në kryeqytet brenda pak më shumë se një javë. Të dy këto sulme i ka marrë përsipër Shteti Islamik.

Të dy burimet i thanë Reuters se shumica e të vrarëve ishin studentë dhe rreth 50 persona të tjerë u plagosën, disa prej tyre thyen gjymtyrët ndërsa hidheshin nga dritaret për t’i shpëtuar sulmit gjatë orëve të mëngjesit.

Zyrtarisht numri i të vdekurve është 22 me 27 të plagosur, sipas ministrisë së brendshme. Vendi mbajti një ditë zie të Martën, ndërsa flamurët u ulën në gjysmë shtizë.

Rreth 100 studentë u mblodhën jashtë universitetit për të protestuar se bisedimet e paqes me talebanët kryengritës në Doha nuk po çonin në uljen e dhunës.

“Megjithëse i shohim këto lloj sulmesh çdo ditë, ka ende bisedime paqësore me ta, të cilat janë me të vërtetë të tmerrshme”, tha një student protestues, Zaryab Paryani.