Shpërndarja e vaksinave/OBSH: Bota në prag të një dështimi katastrofik moral

Kreu i Organizatës Botërore të Shëndetësisë, ka folur me tone të forta, duke thënë se bota ishte në prag të një “dështimi katastrofik moral” në shpërndarjen e vaksinave Covid-19, duke u kërkuar vendeve dhe prodhuesve të shpërndajnë dozat në mënyrë të drejtë në të gjithë botën.

Drejtori i Përgjithshëm i OBSH-së Tedros Adhanom Ghebreyesus tha se perspektivat për shpërndarje të drejtë janë në “rrezik serioz” ashtu si skema e ndarjes së vaksinave COVAX që synon të fillojë shpërndarjen e vaksinave muajin tjetër. Ai vuri në dukje 44 marrëveshje dypalëshe të nënshkruara vitin e kaluar dhe të paktën 12 janë nënshkruar tashmë këtë vit.

“Kjo mund të vonojë dërgesat e COVAX dhe të krijojë saktësisht skenarin që COVAX është krijuar për të shmangur, me grumbullime, një treg kaotik, një përgjigje të pakoordinuar dhe përçarje të vazhdueshme sociale dhe ekonomike”, tha ai. Një qasje e tillë e la botën më të varfër dhe më të prekshme ndaj rrezikut, tha ai në hapjen e takimit vjetor të Bordit Ekzekutiv në formatin virtual.