Si e mori koronavirusin pacienti i parë në Europë, i sëmurë prej 24 Janarit

Një artikull i shkruar nga mjekët gjermanë dhe i botuar në ‘New England Journal of Medicine’ sqaron se një 33-vjeçar nga Mynihu, në Gjermani, mund të jetë europiani i parë që është prekur dhe transmetuar infeksionin e koronavirusit.

Sipas një harte gjenetike të publikuar në faqen e internetit ‘Netxstrain’, e cila rindërton një lloj peme gjenealogjike të virusit, i infektuari gjerman mund të ketë ‘ushqyer’ në heshtje zinxhirin e infeksioneve që u përhapën në Itali dhe në Europë.

‘Pacienti 1’ shfaqi simptomat e para në 24 janar, pasi takoi një koleg nga Shanghai, i cili më pas u testua pozitiv. Në katër ditët në vijim, shumë punonjës të kompanisë gjermane ku ai punonte gjithashtu u testuan pozitivë.

Megjithëse selia e kompanisë pas kësaj ishte mbyllur, studiuesit besojnë se shpërthimi i Mynihut mund të ketë qenë i lidhur me një pjesë të mirë të epidemisë në Europë, përfshirë Italinë.

“Është për tu theksuar – shkruajnë autorët e studimit- që infeksioni duket se është transmetuar gjatë periudhës së inkubacionit, kur simptomat ishin të buta dhe jo specifike”.