Si erdhi në pushtet Putin nga bombardimet vdekjeprurëse në vitin 1999?

David Satter, gazetari amerikan që kaloi dekada duke raportuar mbi politikën ruse para se të dëbohej, është nga njerëzit e parë që pretendoi se Presidenti Putin dhe FSB mund të ishin përfshirë në bombardimet vdekjeprurëse të apartamenteve në Rusi në 1999.

Në një intervistë për “Insider”, Satter foli rreth këtyre bombardimeve, rreth të cilave ishte shprehur edhe më parë në një samit të organizuar nga Fondacioni i të Drejtave të Njeriut, që mblodhi së bashku disa nga kritikët më të mëdhenj të Putinit.

“Në verën e vitit 1999 dukej e pamundur që Putini të bëhej presidenti i ardhshëm rus, por bombardimet në ndërtesa dhe apartamente ndryshuan gjithçka. Pas këtyre ngjarjeve u tha që tani ne po jetojmë në një vend krejt tjetër”, u shpreh Satter.

Më shumë se 200 njerëz u vranë në bombardimet e shtatorit. Rusia fajësoi militantët çeçenë, duke shkaktuar Luftën e dytë Çeçene. Sipas Satter, çeçenët u akuzuan pa asnjë provë, dhe duke vepruar kinse me sukses ndaj tyre Putini doli përpara popullit si shpëtimtari i vendit, u vu në krye të një lufte në Çeçeni dhe arriti të zgjidhej presidenti i ardhshëm rus.