Si të mos mjaftojë Covid! Japonia përfshihet nga përmbytje “apokaliptike”

Si të mos mjaftonin telashet me pandeminë e koronavirusit, jugu i Japonisë është përballur me reshje shiu të paprecedentë, të cilat kanë shkaktuar përmbytje masive e rrëshqitje dheu.

Të pakën 14 persona mendohet të kenë vdekur në një azil pleqsh në ishullin Kyushu. Dhjetëra mijëra vetëve nga ana tjetër i është kërkuar të braktisin shtëpitë e tyre teksa lumi Kuma në prefekturën Kumamoto ka dalë nga shtrati e është kthyer në kërcënim për komunitetet përreth.

Kryeministri Shinzo Abe ka urdhëruar dërgimin e 10.000 trupave në rajon pasi shërbimet e emergjencës atje nuk po i bëjnë dot ballë vetë situatës. Sipas Abes, shirat parashikohet të vazhdojnë të rrëmbyera edhe përgjatë ditës së diel ndërsa i nxiti njerëzit të tregojnë “ kujdes maksimal”.

Dëshmitarë okularë treguan sesi vërshimi i ujërave ka marrë me vete pemë e shtëpi, ndërsa ajri ishte mbushur me erën e gazit të dalë nga tubacionet e dëmtuara. Agjencia vendase e Meteorologjisë tha se reshje të tilla shiu nuk ishin parë asnjëherë në rajon.