Spanja kërkon t’i japë fund monarkisë

Skandalet brenda familjes mbretërore kanë bërë që shumica e spanjollëve të kërkojnë rikthimin e plotë të republikës dhe dhënien fund të monarkisë si formë pushteti.

Një sondazh me 3 mijë të intervistuar tregoi të hënën se 48 përqind janë në favor të referendumit për këtë çështje, e nëse do hidhej në votë, 40,9 përqind do përkrahnin republikën, 34,9 përqind familjen mbretërore, dhe 24,2 përqind do ishin të pasigurt.

Shkaktar për rënien e pëlqimit publik për monarkinë besohet se është bërë ish-mbreti Huan Karlos.

82-vjeçari tani jeton në Emiratet e Bashkuara Arabe pasi hoqi dorë nga froni në 2014-ën.

Por ai përflitet se pas detyrës mori ryshfet nga dy firma spanjolle për kontratën me vlerë 6,7 miliardë euro që ato fituan në Arabinë Saudite për ngritjen e një linje të shpejtë hekurudhore.

Ish-mbreti i ka refuzuar akuzat dhe është treguar i gatshëm t’i përgjigjet hetuesve në Spanjë dhe Zvicër ku pretendohet se mbante llogari të fshehta bankare.

Krahasuar me sondazhin e muajit gusht, përkrahja për monarkinë spanjolle ka rënë me rreth 20 përqind.

Kurorën mbretërore dhe postin simbolik të kryeshtetarit aktualisht e mban Mbreti Filipi i Gjashtë.

Ai ka për rol kushtetues t’u ofrojë partive fituese në zgjedhje mundësinë e formimit të qeverisë, ndërsa parlamenti i Spanjës ka fuqinë vendimmarrëse në vend.