Të shtëna me armë zjarri në protestat në Bolivi, vritet një oficer policie

Një oficer policie ka humbur jetën dhe një tjetër është plagosur rëndë gjatë përleshjeve të dhunshme në Bolivi midis mbështetësve të ish-Presidentit Evo Morales dhe forcave të sigurisë. Lajmin e konfirmoi zëvendësministri i Brendshëm Johnny Aguilera, i cili sqaroi se pati të shtëna me armë zjarri që rezultuan fatale.

Ngjarja ndodhi në qytetin minerar Yayagua, në rajonin e Potosit, ku situata ka qenë e tensionuar prej ditësh. Më herët, Presidenti aktual Luis Arce njoftoi fillimin e një operacioni të përbashkët mes policisë dhe ushtrisë për të larguar bllokadën e një autostrade kryesore në pjesën qendrore të Bolivisë.

Protestat dhe bllokadat kanë nisur që më 2 qershor, ku mbështetësit e Morales kanë bllokuar dhjetëra rrugë në të gjithë vendin. Ata kërkojnë dorëheqjen e Presidentit Arce, duke e akuzuar për përgjegjësi në krizën e thellë ekonomike dhe për manipulime në sistemin gjyqësor e atë zgjedhor, me qëllimin për të penguar pjesëmarrjen e Morales në zgjedhjet presidenciale të 17 gushtit.