Tensionet SHBA-Iran, Papa apelon për paqe: Lufta sjell vetëm vdekje dhe shkatërrim

Papa Françesku ka bërë apel që kudo në botë të ruhet qetësia dhe të mos shkaktohen tensione apo luftëra.

Duke marrë shkas nga marrëdhëniet e acaruara mes Shteteve të Bashkuara të Amerikës dhe Iranit pas vrasjes së gjeneralit Kasem Sulejmani, Papa kërkoi që të gjendet gjuha e përbashkët.

“Në shumë anë të botës është krijuar një klimë tensioni. Lufta sjell vetëm vdekje dhe shkatërrim. I ftoj të gjitha palët që të mbajnë të ndezur flakën e dialogut dhe të vetëpërmbajtjes dhe të largohen nga hija e armiqësisë”, tha Papa Françesku.

Thirrjet ai i bëri gjatë celebrimit të meshës së të dielës në sheshin Shën Pjetër të Vatikanit.