Trump fajëson të dy palët për dhunën në Charlottesville

Presidenti amerikan Donald Trump ka fajësuar sërish “të dy palët” për trazirat e dhunshme në Charlottesville, Virxhinia, ku një protestuese e majtë mbeti e vdekur dhe dhjetëra të tjerë u plagosën.

Përmes një deklarate në fillim të javës, presidenti dënoi supremacistët e bardhë për dhunën, por në një dalje tjetër ditën e martë, Trump gjithashtu fajësoi mbështetësit e krahut të majtë që u përplasën me të djathtët.

“Njerëz të shkëlqyer” ishin gjithashtu pjesëmarrës në protestën për mbrojtjen e statujës, sipas presidentit, ndërkohë që ai shtroi çështjen nëse duhen hequr edhe statuja të ish-presidentëve George Washington dhe Thomas Jefferson, pasi edhe ata kishin qenë pronarë skllevërish.

Presidenti gjithashtu mbrojti kohën që ju desh për të bërë këtë deklaratë, duke thënë se i ishte dashur të peshonte të gjithë faktet.

Gjatë fundjavës, Trump u përball me akuza se nuk kishte dënuar specifikisht ekstremin e djathtë për dhunën në Charlottesville.

Grupe të djathta protestuan kundër heqjes së statujës së Gjeneralit Robert Lee, që komandoi forcat pro-skllavërisë së Konfederatës gjatë Luftës Amerikane Civile.

Një ditë më pas, grupet e majta protestuan kundër këtij marshimi të të djathtëve, ndërkohë që demonstrata mori tone të dhunshme. Një makinë përplasi turmën e protestuesve, duke vrarë 32-vjeçaren Heather Heyer dhe duke plagosur 19 të tjerë.

Por këto komente më të fundit të presidentit sërish kanë ngjallur debate. Mbështetës të të djathtës e kanë falenderuar Trump për dënimin e “terroristëve të majtë” siç i quajtën ata, ndërkohë që senatorë dhe figura të shoqërisë amerikane e akuzuan presidentin si mbështetës të urrejtjes, përçarrjes dhe terrorizmit vendas.