Trump: Nuk përjashtojmë mundësinë ushtarake ndaj Venezuelës

Shtetet e Bashkuara të Amerikës nuk e kanë përjashtuar marrjen e një veprimi ushtarak kundër Venezuelës, ku presidenti Nicolas Maduro është akuzuar për përpjekje për vendosjen e diktaturës, deklaroi presidenti amerikan, Donald Trump.

Sekretari amerikan i Shtetit, Rex Tillerson së bashku me ambasadoren amerikane në OKB, Nikki Haley dhe këshilltarin amerikan të Sigurisë, McMaster zhvilluan dje një takim me presidentin Trump, në resortin e tij të golfit në Bedminster, New Jersey, ku diskutuan rreth çështjes së situatës në vendin e Amerikës së Jugut .

“Venezuela është kthyer në një rrëmujë të madhe, në një vend i rrezikshëm dhe në një situatë të trishtuar”, tha presidenti Trump.

Më herët , Shtëpia e Bardhë njoftoi se presidenti i SHBA-së, Donald Trump kishte refuzuar një bisedë telefonike me homologun e tij venezuelian, Nicolas Maduro duke thënë se ai nuk do të komunikonte me të deri sa “demokracia të rivendosej” në Venezuelë.