Vala e dytë e Covid-19? Ja çfarë ndodhi në vendet e Europës Juglindore përgjatë muajit gusht

Shumë shtete në Europë po përjetojnë një valë të dytë të Covid-19.  Qendra Europiane për Parandalimin dhe Kontrollin e Sëmundjeve, bën me dije se shtetet e Europës Juglindore të Evropës sikundër Shqipëria, Bullgaria, Mali i Zi, Maqedonia e Veriut dhe Rumania raportuan gjatë gushtit një rritje të rasteve të të infektuarve, krahasuar me muajt e parë të përhapjes së virusit.

Ekspertët vijojnë të përsërisin se nuk duhet ulur vigjilenca. Sipas Sarah Fortune, pedagoge në Shkollën e Shëndetit Publik të Harvardit, gjithmonë duhet ta konsiderojmë veten të rrezikuar derisa të kemi imunitet – gjë që asnjë komunitet nuk e ka arritur – ose derisa të kemi një vaksinë. ”Të flasësh për valën e parë ose të dytë nuk është një koncept shumë i përpiktë. Shumë janë të shqetësuar për atë që do të ndodhë në vjeshtë”,- tha ajo.

Shefi i departamentit për sëmundjet infektive në Universitetin e Edinburgut, Jürgen Haas, thekson se kjo është shumë e mundur pasi sipas tij të gjithë e dimë që Covid-19 transmetohet nga pështyma dhe gjatë sezonit të dimrit, kur njerëzit priren të qëndrojnë kryesisht në dhoma të mbyllura, automatikisht do të ketë një rritje të rasteve.