Vladimir Putin merr vaksinën Sputnik V kundër covid-19

Bota E Mërkurë, 24 Mars 2021 15:51

Ashtu si krerë të tjerë të lartë në të gjithë botën edhe Presidenti rus Vladimir Putin është vaksinuar kundër Covid-19.

Njoftimi erdhi nëpërmjet një postimi në twitter në profilin zyrtar të kompanisë që ka prodhuar vaksinën ruse Sputnik.

Postimi shoqërohet me një foto të Presidentit Putin duke buzëqeshur me krahët e ngritur për fitore.

Lajmi u raportua gjithashtu nga agjencia Interfax, e cila citoi zëdhënësin e Kremlinit, Dmitri Peskov. “Putin ndihet mirë. Ai ka një ditë pune të plotë nesër,” tha Peskov.

Më herët edhe udhëheqës të tjerë si presidenti I SHBA Joe Biden janë vaksinuar kundër koronavirusit.

Ai mori dy doza të vaksinës Pfizer/BioNTech një në dhjetor dhe tjetrën në janar, ndërsa e gjithë procedura e bë edhe publike nëpërmjet një videoje.

Pas tij edhe zv. presidentja Kamala Harris dhe të tjerë zyrtarë të lartë amerikanë. Mes udhëheqësve të vaksinuar janë edhe kryeministri I Indisë, Narendra Modi, kryeministri I Izraelit, Benjamin Netanyahu, ai i Hungarisë Viktor Orbán, britaniku Boris Johnson, presidenti I Turqisë Recep Tayyip Erdogan etj.

Ndryshe nga liderët e tjerë botërore, kancelarja gjermane, Angela Merkel, nuk është vaksinuar ende ndaj koronavirusit.

Gjatë një interviste për një gazetë gjermane, Merkel tha se asaj nuk i lejohet të marrë vaksinën e AstraZeneca, për shkak se vaksina në fjalë nuk është aprovuar për personat mbi 65 vjeç.

Procesi i vaksinimit në të gjithë botën po vijon gradualisht. Izraeli, Emiratet e Bashkuara Arabe dhe Bahrejni janë vendet që kanë vaksinuar një pjesë më të madhe të popullsisë së tyre.