Zelensky do të mungojë në ceremoninë e inaugurimit, Trump: Nuk e ftova

Presidenti i Ukrainës, Volodymyyr Zelensky nuk është i ftuar të marrë pjesë në ceremoninë e inaugurimit të Presidentit të zgjedhur të SHBA-së, Donald Trump muajin e ardhshëm. Trump do të betohet zyrtarisht si presidenti i 47-të i SHBA-së më 20 janar në një ceremoni inaugurimi në Kapitol në Uashington, DC.

Të hënën, Trump mbajti konferencën e tij të parë zyrtare për shtyp që nga fitorja e zgjedhjeve. I pyetur nga gazetarët nëse ai e kishte ftuar Zelenskyn, Trump u përgjigj: “Jo, nuk e ftova”. Ai, megjithatë, shtoi: “Nëse ai do të donte të vinte, unë do të doja ta kisha atë aty”.

Trump u takua me Zelensky këtë muaj në Paris së bashku me presidentin francez Emmanuel Macron për bisedime të përqëndruara në krizën e Ukrainës. Trump tha më pas se donte që armiqësitë midis Moskës dhe Kievit të përfundonin sa më shpejt të ishte e mundur.