Drafti i Ramës nuk pranohet nga Serbia, Vuçiç: S’ka të drejtë të bëjë propozim për Asociacionin

Serbia nuk e sheh prozitive draftin e Asociacionit të punuar nga ekspertë amerikanë që është hedhur në tavolinë nga kryeministri Edi Rama, për të qetësuar situatën në veriun e Kosovës. Presidenti serb, Aleksandër Vuçiç thotë se Rama dhe Kurti nuk kanë të drejtë të bëjnë një propozim për statutin e Asociacionit të Komunave me Shumicë serbe.

Gjatë një interviste për Reuters, lideri serb ripërsëriti se të drejtën e propozimit të këtij statuti e ka vetëm ekipit menaxhues, për të cilin është rënë dakord më herët, i përbërë nga serbët.

“Kur dëgjoni që Kurti ka propozimin e tij për Asociacionin e Komunave Serbe, se Rama ka propozimin e tij për Asociacionin e Komunave Serbe, që disa OJQ kanë propozimin e tyre për Asociacionin e komunave serbe, asnjëri prej tyre nuk ka të drejtë të ketë propozime. Ai propozim duhet të bëhet nga serbët dhe ekipi menaxhues i përbërë nga serbët”, tha Vuçiç.

Dje Rama deklaroi para gazetarëve se ka përgatitur një draft statut për Asociacionin të cilin ia kishte dërguar presidentit francez Macron dhe kancelarit gjerman, Scholz.