David Wisner: SPAK në lartësinë e duhur!

(Ky editorial shikohet më i plotë si video)

David Wisner: SPAK në lartësinë e duhur!

I Ngarkuari me Punë i Ambasadës Amerikane, David Wisner, thotë se SHBA mbështet fuqimisht punën e SPAK-ut dhe institucioneve të reja të drejtësisë. Duhet theksuar se zoti Wisner është mjaft aktiv në Shqipëri dhe se po mbështet demokracinë shqiptare që të rritet e forcohet. Ai ka pak muaj që ndodhet në Shqipëri, porse ka informacion sikur të kishte 5 vite në Tiranë.

Ka disa javë që ish-kryeministri Berisha po sulmon SPAK dhe një gjyqtare të gjykatës së Posaçme. Në të vertetë Berisha duhej të shkonte dhe të paraqitej në gjykatë në mënyrë që qytetarët të kishin mundësinë për të parë nëse sulmohet politikisht apo ka fakte ndaj tij.

Por edhe mazhoranca po sulmon SPAK.

Pas krititikave që bëri kryeministri Rama në kongresin e fundit të PS që indirekt tha se “nuk jemi Republika e prokurorëve të SPAK, por Republika e Shqipërisë”, ambasada amerikane përgjigjet qartë dhe në mënyrë të prerë se SPAK po punon shumë mirë dhe se ka mbështetjen e SHBA.

I pyetur nëse ka një koment për akuzat e Berishës, David Wisner i kujton edhe njëherë ish-kryeministrit se është i shpallur non grata nga SHBA dhe se nuk ka përgjigje për një person që është futur në listën e zezë të amerikanëve për korrupsion madhor.

Në një prononcim për Panorama ai përgjigjet disa pyetjeve. 

Ka mjaft reagime ndaj hetimeve të SPAK ndaj disa ish-ministrave dhe kryebashkiakëve socialistë, por edhe ish-kryeministrit Berisha dhe dhëndrit të tij. A mund të garantoni ju opinionin publik në Shqipëri se SPAK është i pavarur dhe jo i ndikuar nga pushteti, siç ka ndodhur në të kaluarën?

Ne besojmë se SPAK po qëndron në lartësinë e atij mandati. Ka një shprehje në Shtetet e Bashkuara, që ‘drejtësia është e verbër’. I gjithë qëllimi për ngritjen e SPAK ishte të krijohet një institucion i pavarur për të hetuar krimin e organizuar dhe korrupsionin, përfshi në nivelet më të larta të qeverisjes. Kjo është gjëja më me rëndësi që ai të jetë vërtet i suksesshëm dhe i efektshëm. Kemi parë të hetohen, t’u ngrihen padi dhe të dënohen zyrtarë të niveleve të larta nga i gjithë spektri politik. 

Pyetje: U referohem deklaratave politike të z. Berisha, i cili e konsideron SPAK si “kamxhikun e Ramës”, ndërsa Kryeministri Rama nga ana e tij e konsideron reformën në drejtësi dhe SPAK-un produkt të partisë së tij për shtetbërje. Cila është përgjigja juaj për këto pikëpamje të palëve politike në Shqipëri?

Nuk do t’i përgjigjem dikujt që është sanksionuar nga Shtetet e Bashkuara për korrupsion madhor. Shtetet e Bashkuara janë krenare të mbështesin punën e SPAK-ut dhe institucioneve të tjera të drejtësisë dhe do të vazhdojmë të mbështesim kërkesat e popullit shqiptar për t’i dhënë fund pandëshkueshmërisë. Siç e vërejta, kemi investuar fort në suksesin e reformave në drejtësi të Shqipërisë, përfshi SPAK, përmes ekspertizës, financimit dhe mbështetjes sonë politike. Jemi krenarë të jemi partnerë me Shqipërinë. Çdo shqiptar meriton të jetojë në një vend ku secili është i barabartë përpara ligjit, ku shteti ligjor funksionon dhe ku secili ka një mundësi të barabartë për begati. Jo vetëm sepse e kërkon e ardhmja euro-atlantike e Shqipërisë, por sepse është gjëja e duhur.

A besoni se SPAK-u do t’i japë fund pandëshkueshmërisë në Shqipëri dhe si do ta mbështesni më tej këtë strukturë të posaçme prokurorësh, që të jetë e pavarur dhe të rrisë më tej besueshmërinë ndaj publikut shqiptar?

Shtetet e Bashkuara do të vazhdojnë të qëndrojnë në krah të Shqipërisë dhe rrugës së saj euro-atlantike. Ambasadorja Kim e kishte zakon të thoshte se reforma në drejtësi nuk është e lehtë, e shpejtë, apo e përsosur, por po e shohim të japë rezultate. Vazhdon të ketë të drejtë. Shtetet e Bashkuara dhe partnerët e aleatët tanë do të vazhdojnë t’i mbështesin përpjekjet e Shqipërisë për të luftuar korrupsionin, përfshi mbështetjen tonë për SPAK-un. Përfaqësues të Departamentit të Drejtësisë dhe të Shtetit, si dhe kolegët tanë nga FBI dhe DEA do të vazhdojnë të qëndrojnë në krah të Shqipërisë. Mendoj se ia vlen të vihet në dukje se në gjashtë vitet e kaluara, Shtetet e Bashkuara kanë investuar mbi 27.5 milionë dollarë në programet për ligjzbatimin dhe reformën në drejtësi në Shqipëri.

Kjo është deklarata e të Ngarkuarit me Punë të Ambasadës Amerikane në Tiranë, zotit David Wisner.

Duhet theksuar se nga të gjitha sondazhet SPAK ka kuoatat me të larta të besueshmerisë në publik, pasi ka guxuar dhe po vazhdon të prekë të paprekshmit e politikës shqiptare.

Ndaj SPAK nuk preket sepse po punon më përkushtim dhe kurajo ligjore.

Kur flet David Wisner ka folur SHBA, kështu që politika të hesht dhe të mos sulmojë SPAK-un.