Video editorial i “Koha Jonë”: Edi Rama dhe Opozita!
Video editorial i “Koha Jonë”: Edi Rama dhe Opozita!
Edi Rama dhe Opozita!
Edi Rama mbetet një lider karizmatik, arrogant, i përzier me kulturë dhe vizion europian; ironik deri në sarkazëm, lakon mjaft mirë fjalën shqipe sa po të mos e njohësh mirë, të merr në qafë!
Edi Rama e ka mision brenda vetes që të mbetet në histori.
Ai e ka thënë që në nëntor 2013, kur dha intervistën e parë si kryeministër pikërisht në gazetën ku u rrit dhe u bë i njohur në publik, në gazetën KOHA JONE. Rama tha se jam kryeministër dhe do drejtojë Shqipërinë në vitet e ardhshme që të mbahem mend për mirë. Më saktë ai nënkuptoi që të mbetet në HISTORI.
Dhe për të mbetur në Histori ai përdori gjithçka; të majtë e të djathtë, të mirë e të këqinjë në PS; miq dhe armiq.
Dhe pothuaj ia ka arritur qëllimit.
Pyetja shtrohet për mirë apo për keq do mbetet në HISTORI?
Ai mendon për mirë, ndaj ka rritur dozën e investimeve nëpër qytete e katune, duke shtruar rrugë e rregulluar qendrat e qytetëve; ai përballoi një stuhi opozitare të Unaza e Re dhe tani po e bën fakt atë që kishte në mendje; një unazë europiane dhe që tani njerëzit kanë filluar të thonë, edhe ata që nuk e duan: BERI MIRË!
Por në këtë rast Edi Rama duhet tju kërkojë falje atyre që u përdorën nga Opozita për qëllime politike dhe u dhunuan nga policia; Edi Rama duhet ti kompensojë 100 përqind banesat që ua prishi, pa vecuar se “ky e kishte me leje legazimi e ky jo”. Ata janë shqiptarë që mezi e ndërtuan jetën aty, natyrisht në vendin e gabuar, por ishin qeveritë që i lejuan.
Edi Rama përdor çdo mjet për të realizuar qëllimin.
Tani po bën realitet një projekt për Portin e Durrësit si një nga më kryesoret në Mesdhe.
Ai ka kudo njerëzit e tij, në çdo qoshe pushteti e cepi institucioni kushtetues.
Dhe nuk do ndalet edhe këto katër vite, edhe për faktin, se për dreq, ka para vetes një Opozitë të shpartalluar.
E kjo nuk është një gjë e mirë për Shqipërinë, por as edhe për qeverinë.
Nëse një qeveri ka përballë një Opozitë të fortë, të besueshme dhe me emra të spikatur në publik, edhe qeveria do jetë e kujdesshme.
Edi Rama nuk ndalet derisa ta realizojë atë që ka në mendje.
Dhe, për dreq, në mendje ka se vetëm në vitin 2030 do iki nga pushteti!
E kjo pra, se nuk kemi Opozitë!
Ndryshe ai kishte marrë avionin më të parë drejt Parisit…
