Ibrahimaj: Biznesi mbështet rritjen e pagave. Indeksimi për administratën do të bëhet me ligj

Biznesi privat mbështet rritjen e pagës minimale dhe mesatare në vend. Ky është përfundimi në të cilin ka arritur një anketim i realizuar nga Këshilli i Investimeve ku morën pjesë 506 biznese në vend, rezultatet e të cilit i bëri të ditura ministrja e Financave dhe Ekonomisë, Delina Ibrahimaj.

“Besojmë se politika që kemi ndërmarrë për rritjen e pagës në sektorin publik do të ketë ndikim në rritjen e pagës mesatare në të gjithë sektorin privat. Rezultatet e vrojtimit konfirmojnë bindjen që ne kishim, nisur dhe nga takimet që kemi bërë me ju, që paga minimale duhet rritur dhe paga mesatare në vend duhet rritur”,-tha Ibrahimaj.

Duke folur në mbledhjen e Këshillit të Investimeve, ministrja informoi se qeveria është duke diskutuar që të përcaktojë me ligj indeksimin e pagave për administratën publike.

“Indeksimi i pagave, sa i përket administratës publike, do të fillojë të jetë i zbatueshëm me përfundimin e reformës së pagave. Pasi të përfundojë rritja në korrik të vitit 2024 ne do të fillojmë të indeksojmë pagat e administratës publike njëherë në dy vite me normën mesatare të inflacionit”,tha më tej ministrja.