Jorida Tabaku: Rritja e pensioneve, një ofendim për pensionistët

Deputetja e Partisë Demokratike, Jorida Tabaku, ka kritikuar rritjen minimale të pensioneve prej vetëm 25 lekësh në ditë, e cila pritet të hyjë në fuqi në muajin tetor. Sipas Tabakut, kjo rritje është një ofendim për 750 mijë pensionistët, të cilët përballen çdo ditë me çmime që janë rritur deri në 30% për ushqimet dhe shpenzimet bazë.

Ja çfarë thotë deputetja e PD, Jorida Tabaku, në videon e publikuar në rrjetet sociale:

”25 lekë në ditë është rritja e pensioneve që ka premtuar Qeveria për 750 mijë pensionistët duke nisur që nga fillimi i muajit tetor. Çfarë mund të blejë një pensionist me 25 lekë shtesë në ditë? Cmimet janë rritur pothuajse 30%, duke nisur nga qumështi, djathi, perimet, vaji,orizi , sheqeri, çdo lloj cmimi gjatë 3-4 viteve të fundit është rritur deri në maksimumin 30% ndërkohë që rritja e Qeverisë ka qenë milimetrike.

Çfarë mund të blejë një pensionist me këtë 25 lekësh në ditë? Si mund t’ia dalë të mbijetojë në një vend ku çmimet e rritura përditë gllabërojnë pagat e të gjithë shqiptarëve? Kjo është dhe arsyeja kryesore se pse janë rritur të ardhurat nga emigracioni. Familjet shqiptare sot po varen nga të ardhurat e emigracionit. 26% e familjeve shqiptare sot jetojnë me të ardhurat e fëmijëve të tyre që janë jashtë. Përveç faktit shqetësues që nga 700 mijë pensionistë, në vitin e fundit kanë shkuar në 750 mijë e të rinjtë largohen. 40% e forcës së punës sot është larguar. Qeveria e majtë socialiste krenohet e përmallohet me 25 lekë në ditë. Këtë situatë duhet të ndryshojmë ne. Këtë situatë, për të mbështetur të rinjtë që t’ia dalin këtu e për ta çuar atë te gjithë shtresa sociale e duke e çuar te pensionistët që janë sot shtresa më e nënfinancuar’‘, thotë Tabaku.