Sulmuesi brazilian Caio Jorge ka shprehur dëshirën për t’u rikthyer te Juventusi, duke besuar se tashmë është më i pjekur dhe më i përgatitur për të pasur sukses në futbollin italian. Pas paraqitjeve mbresëlënëse me fanellën e Cruzeiros, 24-vjeçari synon t’i japë një tjetër mundësi aventurës së tij në Torino.
Braziliani ka kaluar një periudhë të shkëlqyer në aspektin individual. Sezonin e kaluar, ai realizoi 21 gola në 33 ndeshje, ndërsa këtë sezon ka shënuar 11 gola në 24 paraqitje. Këto statistika kanë rikthyer vëmendjen te historia e tij me Juventusin dhe te mundësia e një rikthimi në Itali.
Në një intervistë për emisionin “Cronache di Spogliatoi”, Caio Jorge foli hapur për periudhën e kaluar te bardhezinjtë.
“Gjatë pesë muajve që kalova te Juventusi, luajta më pak minuta nga sa prisja. Shpresoja të aktivizohesha të paktën 20 minuta në çdo ndeshje, sidomos pasi gjatë javës stërvitesha me intensitet të plotë dhe shënoja gola në ndeshjet miqësore. Megjithatë, dëmtimi ndikoi padyshim në karrierën time me skuadrën.
Tani jam gati të rikthehem në Itali dhe dua të kthehem te Juventusi. Besoj se mund të paraqitem në një nivel shumë më të lartë. Ëndërroj të luaj sërish në Itali, sepse e njoh gjuhën dhe e dua futbollin italian, por kur mbërrita atje isha shumë i ri“, deklaroi ai.
Caio Jorge theksoi gjithashtu se lidhja e tij me Juventusin mbetet e fortë, pasi klubi e mbështeti gjatë periudhës së vështirë të dëmtimit dhe i dha mundësinë të realizonte ëndrrën për të luajtur në Evropë.