Albin Kurti mes dy ”zjarreve”, nën presionin e Izraelit dhe të Erdoganit

Ende KQZ-ja nuk e ka cerifikuar fitoren e Albin Kurtit në zgjedhjet e 14 shkurit, por kryeministri i ardhshëm është mes dy zjarreve. Lideri i Vetëvendosjes përpos kortezive po përballet me kërkesa të veçanta nga liderët botërorë.

Në morinë e letrave veçohen ato të kryeministrit të Izraelit dhe të presidentit të Turqisë, që i bashkon një temë tejet e nxehtë: përplasja për hapjen e ambasadës së Kosovës në Jeruzalem. Kryeministri i Izraelit, Benjamin Netanyahu përveç që është i lumtur për themelimin e marrëdhënieve diplomatike në fillim të këtij muaji, e fton Kurtin në ceremoninë e hapjes së ambasadës.

“E mirëpres jashtëzakonisht marrëveshjen mes dy vendeve të nënshkruar në fillim të muajit për vendosjen e marrëdhënieve diplomatike dhe shpresoj se ky do të shërbejë si momentum i ri për të forcuar dhe avancuar bashkëpunimin mes nesh. Përpjekja juaj për çështjet e hebrenjve, përfshirë kthimin e pronave, është tejet e vlerësuar. E shoh shumë të rëndësishme vendimin e Kosovës për të hapur ambasadën në Jerusalem dhe ju pres në Izrael në ceremoninë e hapjes.” – thuhet në mesazhin e Netanyahut.

Në anën tjetër, presidenti i Turqisë Rexhep Tayip Erdogan e përgëzon Kurtin për qasjen e tij të matur ndaj çështjes së Jeruzalemit. “Unë jam gjithashtu i lumtur të mësoj për qëndrimin e partisë tuaj që nëse vjen në pushtet, po parashikon një rishikim të angazhimit të Kosovës për hapjen e ambasadës në Jerusalem. Unë mendoj se do të ishte e dobishme të shmangim një hap të tillë që mund t’i shkaktojë Kosovës një dëm të madh”.