Albin Kurti preket nga Covid-19

Kryetari i Lëvizjes Vetëvendosje, Albin Kurti është prekur nga Covid-19. Përmes një postimi në facebook, Kurti ka pohuar se para dy ditësh ka pasur simptoma si kokëdhembje dhe koll, prandaj është testuar dhe ka rezultuar pozitiv me Covid-19.

“Të nderuar anëtarë të Lëvizjes e qytetarë të Republikës. Parmbrëmë kisha disa simptoma: kokëdhembje të lehtë, pak koll dhe dhembje e skuqje të syve. Dje jam testuar për Covid-19 dhe kam rezultuar pozitiv. Në dy javët në vijim do të qëndroj në vetizolim”, ka shkruar Kurti në Facebook.

Kryetari i Aleancës Kosova e Re, Behgjet Pacolli dhe deputeti i Kuvendit të Kosovës nga radhët e AAK-së, Daut Haradinaj i kanë uruar shërim të shpejtë Kurtit.

“Covid 19 është lufta jonë që së bashku duhet ta fitojmë. Kryetarit të VV, Albin Kurti i uroj shërim të shpejtë, ndërsa të gjithë qytetarëve u bëj apel që të kenë kujdes dhe të respektohen masat. Mbajeni maskën, distancën dhe higjienën”, ka thënë Pacolli në një postim në Facebook.