Ambasadori Hill:Ibrahim Rugovën e shihnin si shenjt, i përuleshin dhe i puthnin dorën njësoj si Papës
Duke përshkruar një vizitë që kishte bërë bashkë me presidentin, Ibrahim Rugova në fshatrat e Malishevës të kapluara nga lufta në nëntor të atij viti, ambasadori Hill shkruan:
“E mora (Rugovën) në makinën time më 3 nëntor (1998) dhe shkuam së pari në fshatin e vogël pitoresk, në Banjë të Malishevës. Minareja e xhamisë së fshatit ishte rrëzuar nga një predhë shumë precize nga tanku, dhe kërma të kafshëve të banorëve të fshatit ende po prisheshin në fushë që prej një muaji, kur serbët i kishin përdorur si ushtrim për marrje në shenjë. Vazhduam pastaj për në fshatin e vogël Ostrozub, ku po ashtu dolëm jashtë në rrugën kryesore, që gëlonte me banorë të kthyer që bartnin dhe tërhiqnin zvarrë plaçkat e veta personale teksa ktheheshin nga mali ku qenë fshehur me javë të tëra në pyll.
Reagimi i tyre kur panë Rugovën ishte i jashtëzakonshëm. Njerëzit fillimisht ngurruan kur e panë prijësin e vet prej më shumë se një dekade, pastaj iu afruan dhe iu hodhën me krahë rreth qafe, duke e puthur në faqe.
Disa iu hodhën në përqafim dhe i ranë në gjunjë, duke i puthur dorën, si të ishte Papë. U ndala për të kapur pamjen në tërësinë e saj. Për ata që kishin thënë se e ka pasur puna e tij, do të doja ta shihnin tani. Se çka i bën disa politikanë karizmatikë dhe çka jo ka qenë koncept përherë i pakapshëm për mua, por në këtë ditë e pashë se Ibrahim Rugova ishte forcë që duhej bërë hesap – ndoshta arsyeja pse UÇKja dhe të tjerë ishin aq të ashpër me të”, shkruan ai.
