Analisti serb: Vuçiç e Thaçi kanë axhendë të përbashkët për ndarjen e kufijve

Mediat serbe raportojnë se ndarja e Kosovës është në tryezën e bisedimeve mes presidentit Hashim Thaçi dhe presidentit Aleksandar Vuçiç. Analisti serb, Dusha Janjiç, në një intervistë për median në Beograd thotë se opsioni i ndarjes ka dy vite që diskutohet mes dy presidentëve.

“Që ajo (ndarja) nuk është e përjashtuar, flet fakti se ndarja përsëritet gjithnjë nga Ivica Daçiç (ministër i Punëve të Jashtme) si dhe prania në rendin e parë me gazetarë e Aleksandar Vulinit (ministër i Mbrojtjes), i cili po ashtu është për ndryshimin e kufijve në Ballkan“, i ka thënë agjencisë Beta Janjiç.

Ai ka shtuar se edhe paralajmërimi i Hashim Thaçit për mbajtjen e një referendumi për bashkimin e Luginës së Preshevës me Kosovën, nuk është gjë tjetër veçse një version i planit për kufizim e ndarje për të cilin kanë biseduar gjatë vitit të shkuar dhe sivjet Vuçiç e Thaçi.

“Është e qartë se ekziston një axhendë e përbashkët sipas të cilës veprojnë Vuçiçi e Thaçi dhe se ata dëshirojnë që procesin ta përfundojnë përmes një presioni të tmerrshëm ndaj opinionit duke paralajmëruar referendume të ndryshme”, ka thënë Janjiç.