Arrestimi – Francë, nis gjyqi për Haradinajn

Gjykata e Colmarit në Francë ka nisur shqyrtimin gjyqësor ndaj Ramush Haradinajt.

Ky trup gjykues francez pritet të vendosë nëse kreu i AAK’së, i arrestuar më 4 janar 2017 në aeroportin e Bazelit, do të ekstradohet në Serbi, siç kërkohet në urdhër-arrestin e lëshuar nga Beogradi ndaj tij, apo do të lihet i lirë.

Megjithatë, Arianit Koci, avokat i Haradinajt në Kosovë, thotë se është i bindur se klienti i tij do të lirohet pas disa çasteve.

“Gjasat janë zero që Haradinaj të ekstradohet në Serbi”, tha Koci për Gazetën Express.

“Kjo është luftë speciale e Serbisë ndaj Haradinajt, si drejtues i UCK’së në Zonën e Dukagjinit”, konsideroi tutje avokati kosovar.

Ministria e Punëve të Jashtme e Republikës së Kosovës është në kontakt të vazhdueshëm me ministrin e jashtme të Francës.  Ministri Enver Hoxhaj ka deklaruar se kërkesat serbe të motivuara politikisht për arrestimin e qytetarëve dhe lidershipit të Kosovës janë thirrje për të vepruar në mënyrë reciproke gjë që Kosova më së paku e dëshiron.

“Ambasada tona në Francë dhe institucionet e Kosovës po bëjnë përpjekje maksimale për ta liruar z. Haradinaj dhe tashmë diplomatët tanë edhe e kanë takuar atë personalisht”, tha Hoxhaj.

Haradinaj kishte me vete një pasaportë diplomatike, gjatë kohës që u arrestua nga policia kufitare franceze.

Serbia ka ngritur 108 padi penale kundër tij, për shkak të dyshimit se ka kryer krime të rënda, duke përfshirë terrorizmin dhe vrasjen e civilëve në Kosovë në vitin 1998 dhe 1999.